今個月政界似乎非常多喜事，立法會主席曾鈺成再婚21號行禮，白鴿黨肥仔明本月18日係成親25年銀婚紀念，為隆重其事，肥仔明話要搞啲嘢老婆，打算舉行一個派對慶祝，邀請圍內好友出席，佢話最擔心煲呔揀當日好日公佈政改方案，屆時人人忙做正經事，慶祝會隨時泡湯。
121212阿涂註冊
白鴿黨高達原來都係84年同陳樹英結婚，數數手指都係銀婚紀念，不過高達中途「落車」，雖然後來再「上車」兼搭番同一架車，咁樣仲算唔算結婚25年，真係好難計噃。下個月再婚嘅涂謹申雖然覓得第二春，但見到人哋婚姻長長久久，不無感慨咁話自己又要重新計起咯。
據知阿涂鐵定12月12日中午12點註冊，好意頭又易記。煲呔今個月17號結婚40周年紅寶石婚，由於要去參加APEC見胡總，據知已於日前慶祝。