高官健康狀況關乎公眾利益，忽然腳痛真係十分麻煩，唔係個個好似前局長肥馬咁多得（耶）穌哥帶挈，給予佢健康體魄重出江湖搵真銀。9月底去美國公幹，回港後急性心臟病發嘅財爺鬍鬚曾，做完通波仔手術後，休息個多月又要飛嘞，噚日去新加坡出席亞太經濟合作組織會議。
醫生話唔可以太勞累
呢次係鬍鬚曾手術後首次外訪公幹，今次同商務及經濟發展局局長劉吳惠蘭同行，會同各國代表探討點樣強化多邊貿易制度、促進區域經濟融合，同埋推進可持續與共融經濟增長。佢傍晚抵達新加坡時話自己身體狀況良好，但會盡量爭取時間休息。據講鬍鬚曾落機時精神幾好，搭一程短途機去新加坡，冇大問題。
鬍鬚曾喺新加坡期間，會出席部長級非正式會議，討論增長嘅新來源，以及亞太經合組織如何推展結構改革，提高潛在生產增長率，又會出席兩個全體大會，討論「全球經濟發展和財政措施的關係」同「促進財政以利便持續發展」，星期五返香港，鬍鬚曾離開香港期間，會由發展局局長林鄭月娥做署理財政司司長。
動手術後，醫生勸告鬍鬚曾要減輕工作壓力，最好下午茶時間安排小休，不過鬍鬚曾每日仍然維持12小時工作習慣，最多早少少放工，呢次去新加坡四日三夜行程似乎十分忙碌，醫生話做完通波仔手術嘅人，唔好貿然做劇烈運動或者太勞累，否則有復發風險手尾長，鬍鬚曾事隔個幾月先再搭飛機，今次相信做足檢查先出發，如果要食藥，更加要聽醫生話唔好唔食。
上次搭完長途機入院
早前緊急入院時血壓低到錄唔到，真正死過翻生嘅鬍鬚曾，上次搭完長途機返到屋企忽然唔舒服，好彩太太醒目即call白車送佢入醫院，今次出差幾日，太太又冇同行，佢返香港時，醫院方面唔知使唔使進入最高戒備狀態，萬一有乜狀況，都可以第一時間搶救，並唔係八方心地唔好，只係財爺位高權重，唔可以有疏忽o架。
mailto:[email protected]