中國體壇「國寶」，向來所到之處，都會受到國家特別嘅優待安排，好似羽毛球國家隊前幾日嚟到香港散心嘅食、住、行都豪極，你哋就知道啦！
之不過為中國贏得首面男子奧運徑賽金牌嘅「欄王」劉翔，周一抵達廣州備戰亞洲田徑錦標賽時就遇上寒流，希望佢喺今日嘅110米欄預賽亮相時，可以掀起廣州市民嘅熱情啦！
一贏即可戰世盃
呢幾日寒流襲廣州，溫度大為下跌，而劉翔喺周一由上海抵廣州時，亦遇上另類「寒流」，只獲賽會安排入住番禺一間平民酒店，而到場接機嘅「粉絲」仲得小貓三兩隻。
據講劉翔呢次入住嘅酒店設施太簡單，所以劉翔嚟到仲要特別訂做兩米乘兩米嘅大床，如果真係訂唔切，唔通劉翔要瞓地下？喺食嗰方面都冇咩特別，只係得番同各國代表一齊食嘅「集體餐」，唔知賽會如此「待薄」劉翔，香港班「粉絲」會唔會心痛呢？
查實今次劉翔參加亞錦賽嘅責任非常之重大，贏咗金牌可以取得明年代表亞洲區出戰田徑世界盃賽，可謂為國爭光，受到咁嘅待遇真係唔算合理！劉翔對呢個世界盃金牌亦相當睇重，皆因呢個係佢暫時仲未贏過嘅國際賽金牌，而劉翔今日9:50am就會出戰亞錦賽預賽，決賽就喺星期四晚舉行；以「翔哥」復出後分別喺上海錦標賽、全運會贏得銀牌、金牌，雖則佢喺噚日因為落雨同天氣凍關係而冇練習，但呢次贏金牌實在話都冇咁易啦！
少fans接機場面冷清
另外，我求大俠知道喺劉翔抵達廣州嗰日仲發生咗「爆」事件，就係嗰日明明只係得20幾個記者接機，場面真係相當冷清，最慘嘅係得好少「粉絲」接機、攞簽名。
之前廣州奧委會話劉翔抵達嗰時預計會有「300個記者、5,000名保安」，好在劉翔當時仲識得「笑騎騎」，見慣大場面嘅佢真係識執生，仲識得搞爛gag咁話「你哋咁多媒體嚟接機，搞到我心情有些少緊張呢？」「翔哥」急才咁勁，我求大俠唔畀個「服」字佢都唔得啦！