政府部門浪費成性，連自己友都睇唔過眼，有天文台高層日日跑步大半個鐘頭返尖沙嘴office，身體力行環保又健康，佢同八方講，有時途經一啲公園都睇唔順眼，見到康文署唔論晴天雨天，都十年如一日開大水喉淋花，佢話唔明點解個天落緊雨，都仲要浪費食水淋花，擺明浪費資源，有次忍無可忍，卒之寫信去康文署投訴。
既然唔使自己交水費，下雨天開大水喉淋花都係納稅人畀錢，官僚又點會同你慳呢？因此就算天文台高層投訴，都係冇人理會！近日廣東省旱情嚴峻，高官話要抽少啲東江水幫助內地同胞，又呼籲市民慳啲用水，八方就話，如果真係想減少浪費食水，水務署搞好水管維修，爆少次水管仲實際啦。