歐洲新舊領導人雲集柏林，紀念一九八九年十一月九日推倒柏林圍牆之事。拆卸柏林圍牆，發生在天安門六四清場之後五個月，當年確實令世人目瞪口呆。二十年後睇番轉頭，東德軍警冇開槍射殺東柏林之示威者，蘇聯駐軍冇強力鎮壓，反而放示威者一馬，一念之仁，就造就咗東西德之統一，不知是意外吖，還是上帝眷顧德國人。今年紀念拆圍牆特別有意思之處，就係一位東德女子，因圍牆倒下而可以離開行過去西柏林，竟然成為德國第一位女總理，默克爾夫人唔知有冇在紀念時感動淚下呢？
另一位好多球迷都認識嘅德國第一球星波力克，亦係德東人，二十年前係小孩子一名，已受東德足球官員睇起，送入足球學校訓練。今日嘅波力克，在車路士表現不如林柏特，領取周薪十二萬鎊，當然係要多謝柏林圍牆之消失啦，佢一個月嘅薪水，可以買起成間佢出身嘅德東球會。
時間可以冲淡一切怨恨，冲走互不相容嘅意識形態，小人物往往係意識形態鬥爭嘅犧牲者，死咗都唔知點解，僥倖不死，幾十年後方知被人利用，俾人呃晒。會計Ｍ在中午飯局講起柏林圍牆，談到龍應台之《一九四九》，佢話在龍應台筆下，有數百山東青年跟大隊走咗去台灣，誰知被強行徵召入伍，死咗嘅有十之八九；又有兄弟兩人，分頭搭火車逃亡，一個向北，一個向南，向北嘅俾共產黨捉咗當兵，向南行嘅俾國民黨捉去當兵，兩人數十年後重逢，恍如隔世。一個國家內戰，除咗野心家之外，根本無人得益。
德國人素來充滿睿智，猶太人之中，又以德國猶太人嘅成就震驚世界，例如馬克思理論就將中國搞到天翻地覆，愛因斯坦理論玩轉地球，唔到你唔服。在重要關頭，東德政治局成員不下令射殺人民，目睹他們建起來的圍牆倒下去，促成東西德和平團結統一就係智慧的表現，如果中國人為了海峽兩岸的不同政治體制而大打出手，就醜死鬼咯。
寫到呢度，忽然醒起一九九○年《壹週刊》創刊之前曾經買入一批柏林圍牆碎石造紀念品作宣傳推廣之用，左丁山都有一件，但擺咗去邊呢？一時之間搵唔到，為之悵然。