「2010無綫節目巡禮」昨晚假將軍澳電視廣播城舉行，無綫傾盡全台小生花旦冧客，除陳豪最受女客戶歡迎外，過往備受冷落的準視帝黎耀祥，也憑柴九角色「升呢」，冧盡一眾男女客戶，風頭蓋過一眾花旦。至於高海寧和郭羨妮等則齊齊以性感作招徠。
無綫節目巡禮吸引近1,500名廣告客戶到場湊熱鬧。去年無綫安排藝員坐靚車到場後行紅地氈，但昨晚只安排24座小巴接載藝員，認真慳皮。
佘詩曼講明讓賽
至於一眾花旦如佘詩曼、陳法拉和鍾嘉欣等，昨晚打扮密實，結果被博到盡的二、三線姐仔高海寧、姚子羚和楊秀惠搶盡風頭，其中高海寧和姚子羚不約而同穿上火紅低胸裙出席，至於郭羨妮及陳茵媺的性感晚裝也頗有睇頭。
被視為整晚打扮最惹火的高海寧說：「條裙係自己買，用咗幾千蚊，冇辦法，我冇贊助，首飾都只係水晶嚟啫。着到咁性感都係睇場合，今日係公司好隆重嘅function。」身為一線花旦的阿佘被指打扮輸蝕時說：「嚟緊台慶同頒獎禮都會隆重，所以今晚咪簡單啲。」記者指她輸給高海寧時，阿佘笑道：「佢有本錢。」
陳豪在每年巡禮中例牌被女客戶大包圍拉着影合照，昨晚也不例外，幾度被女客戶逼埋牆角，成為最冧客藝員。至於過去巡禮中備受冷落的黎耀祥，今年終憑《巾幗梟雄》柴九角色「升呢」，僅次陳豪成為廣告客戶合照的搶手貨，而且不止是女客戶，就連男客戶也勁冧柴九，不停拉着他合照。記者指祥仔今年聲勢強勁時，他笑說：「同劇集有關嘅，佢哋係我客戶又係觀眾，總之今晚會盡量滿足大家，好在我係男人，唔怕俾人博懵。」
陳豪習慣被女圍
陳豪被問到勁冧女客戶時笑說：「唔係，柴九都好受歡迎。」可有俾人博懵？陳豪笑說：「冇事，只係俾人逼埋牆啫。我後宮佳麗三千，對慣晒，拍《宮心計》都有50幾個宮婢。」
祥仔和陳豪等在活動上大受廣告客戶歡迎，被重重包圍邀請合照。來自零售業的郭小姐與祥仔合照後說：「佢演技好吖嘛，用心演，真人好自然。」從事健康產品的王小姐選擇與陳豪影相留念，事後她說：「我有睇《宮心計》，覺得陳豪笑容好親切，真人瘦啲㖭。」
無綫昨晚向客戶推介好劇時，以祥仔和鄧萃雯主演的《巾幗梟雄》作招徠，而祥仔更被安排為第一個上台向客戶推介節目的藝員。視后大熱鄧萃雯在巡禮中段才千呼萬喚始出來，她與祥仔以明年新劇《巾幗梟雄之義海豪情》造型出現，全場觀眾即時起哄拍爛手掌。雯女與祥仔手拖手說：「我雯女同祥仔會再創劇集神話。」
採訪：王崇穎、卓寶花、楊潔雯
攝影：葉君海、黃文成
無綫明年部份新節目
劇集：《刑警》 演員：苗僑偉、黃日華
劇集：《女拳》 演員：劉璇、向佐、姜大偉
劇集：《摘星之旅》 演員：劉松仁、葉童、林峯
劇集：《公主嫁到》 演員：佘詩曼、陳豪
劇集：《巾幗梟雄之義海豪情》 演員：鄧萃雯、黎耀祥
劇集：《秋決》 演員：汪明荃、陳鍵鋒、馬德鐘
劇集：《五味人生》 演員：郭晉安、關詠荷、米雪
劇集：《武偈大師》 演員：謝天華、徐子珊
綜藝節目：《荃加福祿壽》 主持：汪明荃
綜藝節目：《世界遊戲王》 主持：曾志偉
綜藝節目：《星星同學會（至尊版）》 主持：吳君如
資料來源：無綫
《花絮》
謝雪心專責陪坐
正在播映的台慶劇《宮心計》除陳豪和佘詩曼外，大多藝員昨晚都穿古裝上陣，葉翠翠、李國麟、韓馬利和陳自瑤等均成為影相佈景板；陳豪和謝雪心（圖）更專責陪坐，駐守道具椅與客戶合照。
嘉穎冷面拖阿佘
昨晚節目巡禮結尾部份，大玩緋聞男女對對碰，無綫刻意安排盛傳分手的鄭嘉穎拖住佘詩曼出場，而林峯則拖鍾嘉欣現身。不過鄭嘉穎全程木無表情，與阿佘連眼神交流也欠奉。
