淋浴屎河中　與象纏綿

想像一下，ElephantBath，與大象冲凉，肌膚之親，多麼溫馨的畫面。我帶着幻想來到捷雲國家公園，才發現這是人與象之間一場鬥智鬥力的比武。每朝十時許，做完清晨Safari的大象，跟男女老幼遊客都齊集在RiversideHotel河畔，來個全天候無國界人獸混浴戰。

記者、攝影：陳慧敏
鳴謝：尼泊爾旅遊局

大象愛玩水，遊客想同佢冲凉，最後自己都成身濕晒。

識食識走的800萬

「Havearide？」抬頭，騎在大象上的象伕頂着大太陽，藍天下用他戙起隻腳高高在上的剪影，向旅客兜搭。問十個，十個都中。大象在尼泊爾地位崇高，在尼泊爾Pokhara起棟樓高兩層、有八間房的小平房連地價不出100萬，但買隻象少說要800多萬，識食識走又識屙，仲可以參加國際象球賽揚威海外，缺點就係熱得滯會發脾氣。所以只要是風和日麗好日子，象伕們都會帶隻象出來曬曬太陽，泡水，解暑。

玩樂屎水中

大象深吸一口水，抬起象鼻就將你噴得一身濕！「嘩，鼻哥窿入水呀！」坐前排的我食到應，接着隨着象伕一聲聲號令，隻象會噴水、坐低、甩頭、轉身，甚至趴低再側身，用變化無窮的招數將你甩下水！在場的十幾隻象背上的各國遊客，同我一樣與大自然抗衡，有人順勢自己棄象潛逃；有人使出鉸剪腳死箝住隻象不放；有人主動反擊，搏命「突吉突吉」地喊，試圖搶奪控象權。可惜我「突吉（向前行）」了成幾分鐘，隻象都紋絲不動，好累，當我想踎低唞唞，頃刻，隻象居然自己翻身！卜通！又跌落水。象伕賤笑，導遊喪笑，我肯定隻象也在偷笑。上岸後我問擔住我把艷紅dot柄遮，曬到身水身汗的導遊「阿叔」（名字Ashok）：「咁熱，唔落水玩？」「Dirty。」佢指吓我背後的象群，就在我剛剛跌下的那個位置，隻象在拉屎。Oh,God！我成晚都笑唔出。

齊齊淋浴
一到冲凉時間，大象就會開心到猛向自己身上噴水。

認輸投降

搞浪漫
有時大象會讓靚女坐在長鼻上，來個面對面。

玩驚喜
有時大象又會突然後腳跪下，上面的人會好似玩滑梯咁跣落水。

劈棍功夫舞

實不相瞞，我同幾個去過尼泊爾的朋友，都想過老來移民那兒。在這裏，hea為人生最高目標。午飯後因太熱，午睡時間實屬天意；七點過後日落西山天就黑齊，食飯前唯一娛樂，就是去廣場旁的「劇場」看民族舞或返屋企睇電視。因為十八世紀時，尼泊爾處處內戰，全民練劍，劍術就發展成一歌功頌德的舞蹈流傳下去，變為Sauraha舞。音樂響起，台上一圈人就開始前擋、後劈，雙手頂地格起劍來，動作同少林棍法有幾分相似。難得他們越跳越快，但仍頗具氣勢。高潮是最古老的孔雀之舞，假扮的孔雀係就係肥啲，個樣又荔園了點，然而「牠」左踏右踏，忽爾闖進觀眾群中送你一支花，忽爾又啄吓你個頭高傲而去，博得場內一陣哄笑。

■年輕人白天放牛養羊，晚上來跳舞，養妻活兒有餘。

全民經營小旅館

下午很悠閒，好多行程都叫你到TharuVillage蹓躂，感受農村風情。實情是除此之外已經無事好做。村裏的人仍在耕田、種玉米、蘿蔔等為生。推開木柵欄，我笑笑口望住園子裏揀米的阿婆，她們就笑笑口讓你入屋，隨便坐，隨便影，羊仔坐在屋子走廊上，嫩草紮成大大個「採青球」般掛在屋中，任羊仔自由出入屋內食飯。小村子仍過着和平生活，近幾年即使經濟倒退，尼泊爾都不算受太大影響。好多山區的人又搬到旅遊區或加德滿都去，由內戰後至今三年來，房價地價已跳升兩倍。有錢的外國人更加參一手來投資，所以捷雲這邊的新旅館也越開越多，$60住一晚已是中高價了！