資金不斷流入香港，當然係有所圖，銀行「水浸」明顯擴散至其他生活層面，好似今年稅貸利息可謂超低，如果資金成本唔平，銀行點會肯借平錢畀你。
香港資金氾濫，熱錢梗係會搵機會炒作，估計其中一個目標係瞄準即將上市的新股，民生銀行（1988）自然係焦點之一。另外，金沙集團分拆金沙中國（1928）上市，相信新一輪申購熱潮即將展開，影子股亦會借題發揮，上次永利澳門（1128）上市，濠賭股炒過一陣，相信今次亦唔會例外。
澳門10月份博彩業收入創新高，按年升40.6%達126億澳門元，提供另一誘因刺激濠賭股造好。最近大摩發表報告，指出銀河娛樂（027）10月轉碼數收益按月升28%，並預期明天公佈的第三季收益理想。
銀娛昨最高升見4.05元，突破52周高位，收報3.97元。銀娛升勢有餘未盡，短線目標可見4.50元。
方星俠