中國會、上海灘創辦人鄧永鏘DavidTang長袖善舞，同英國皇室政界關係密切，前首相馬卓安、戴卓爾夫人、貝理雅都係佢朋友；皇儲查理斯呀肥彭呀更加老友鬼鬼。查理斯最近就委任佢做王子基金會（ThePrince'sCharitiesFoundation）嘅主席，打理北京分部事務。
基金會計劃同中外導演合作，拍攝修復故宮倦勤齋嘅紀錄片，又會幫手保育北京胡同。SirDavid朋友圈廣泛到無人有，要搞掂呢個大project問題應該唔大，佢接受傳媒訪問時話，喺北京開王子基金會辦事處，標誌住中英兩地人民嘅合作。
擺明想討好中方
查理斯曾經喺私人日記裏面話中國領導人好似蠟像咁醜，99年江澤民訪英，佢玩失蹤，到現任國家主席胡錦濤05年訪英，佢又借啲意唔現身；上年唔肯去北京奧運會開幕式，突然又公開撐達賴喇嘛，總之落盡北京面，佢上個月宣佈喺北京搞基金會，話明想成為「中國人民的夥伴」，擺明車馬想討好中方，唔知鄧永鏘幫唔幫得到佢呢。