一場金融海嘯搞到各國央行要齊齊出手，拯救金融企業於水深火熱之中，累街坊嘅罪魁禍首係美國金融業，雖然美國經濟復蘇路係「W形」定「V形」仲未知，但當地唔少金融機構已經喺政府打救下，度過咗難關，單係睇佢哋派花紅有幾豪就知。
20億美金 員工大家分
高盛就諗住年底攞大嗱嗱20億美金出嚟，畀員工分享，呢種氣燄，同舊年向政府求救時嘅落水狗慘樣，簡直係天淵之別，高盛掌舵人仲好自我膨脹咁話，銀行界係做緊神嘅工作（God'swork），企圖將罪人污名抹去。
雖然上季賺咗30億美金，兼且還清埋政府貸款，但高盛故態復萌狂派錢，自然惹嚟各界不滿。
明示收花紅 貴得有道理
高盛CEO布蘭克費恩接受英國報章訪問時死撐，話銀行界其實做緊神嘅工作，除咗幫企業提升資本，亦為投資者創造財富，而銀行派花紅畀員工，係象徵經濟復蘇，即係明示佢收巨額花紅當之無愧。
華華就認為，如果唔係有呢啲魔鬼嘅貪婪，就唔會有呢一場百年一遇嘅金融海嘯，點知啲魔鬼講到自己係神嘅使者，咁真係神又係你，鬼又係你咯！
mailto:[email protected]