金價升勢大龍鳳，有散戶大嘆家陣若有親友結婚，買對似樣嘅龍鳳手鐲贈興，閒閒哋都要幾皮嘢。其實除非要走難，否則黃金根本唔係民生必需品，呢一次黃金大時代，誘因在貨幣唔再值錢，兼有中印兩大國係咁買金。有散戶問點睇金礦股？坦白講，呢種環境邊有人識睇！
二三線股普遍見熱身，對短炒散戶而言係一個好時機。通常散戶都係見股份異動才留意，但急升後才追入，又未必過到自己嗰關。其實散戶可觀察該股急升後沽壓大唔大才行動，因為一般情況，股份唔會升一日咁短癮。
鋼鐵股經過一輪捱打後，開始重新振作。馬鋼（323）昨升5.2%，重上5元；鞍鋼（347）升4.3%，收報14.96元。
重慶鋼鐵（1053）本月初股價跌至橫行區底部2.80元才喘定，昨一度抽上3.12元，平收3.05元。現價可收集，若升破橫行區頂部3.26元，量度升幅可見3.85元。
方星俠