嚟緊周末同下周三係國際賽期，仲有邊幾隊可以打入世盃好快就知，而入咗決賽周嘅球隊，部份會展示佢哋嘅最新球衣，其中日本剛剛推出新波衫，如無意外下周三亞盃外作客香港時會着，到時兩隊亦會上演新衫大比拼。
日本A記為咗今次新波衫亦隆重其事，喺噚日東京明治神宮舉行嘅發佈會上搵咗十幾位國腳做model，為新戰衣造勢，好似田中鬪莉王、中澤佑二同大久保嘉人都有出席，教練岡田武史當然都唔少得。
techfit窄身版蝦人着
日本一向由A記贊助，但每次波衫設計上都同一般A記波衫唔同，有獨特嘅detail位；好似今次推介嘅新戰衣，雖然仍然以藍色為主，但就有以佢哋隊徽內三本足之鳥身上嘅羽毛做暗花，而左邊鎖骨位亦繡上日之丸，一睇就知道係日本戰衣。
另一個特別設計就係件衫會有兩個版，分別推出formotion普通版，同埋techfit嘅窄身版。對於身形「弗」爆嘅球員嚟講，着窄身版當然唔係問題啦，但對部份球迷嚟講，要着呢件可以睇晒身上有幾多舊腩肉嘅波衫，要着得好睇唔係易事。
日本戰衣盛惠千八
至於件波衫已經喺日本公售，好似全國大型波衫舖kamo網上亦有得買，但價錢一啲都唔平，落場techfit窄身版盛惠21,000日圓，formotion版就賣14,595日圓，以家日圓兌港紙成86水，就分別要成1,800同1,300港紙，貴！至於普通版都成萬日圓。想擁有嘅香港球迷唔想捱貴貨又點？咁就要等到出年嘞，因為香港A記透露行貨要到明年3月先至有得賣。
其實，香港隊早前亦公佈咗新嘅主客場波衫，仲決定會喺下周亞盃外鬥日本時再着㖭，設計上就沿用西班牙主場波衫款式，有網友就覺得驚喜欠奉，但勝在平，4舊有找！大戰當前港隊有好消息，就係中村憲剛受傷唔會到港，而森本貴幸亦有傷，缺陣機會大，對港隊嚟講，今次係時候爭氣。