早前講過金沙中國（1928）上市有如開大細，公司果然係心大心細，一開波招股話籌20億美元，後來見市場氣氛改善，澳門博彩業第三季又有番起色，整體升兩成二，即時信心大增，加價一次都唔夠，最終打算集資最多260億元，足足係永利澳門（1128）一倍有多。
永利可以話生不逢時，又招來被人話貴嘅話柄。呢次金沙有永利呢塊擋箭牌，大可放心加價，只要永利唔死得，金沙應該可以袋袋平安過到骨。
承銷團強調新嘅招股價以上限定價的話，反映賭業股估值嘅EV/EBITDA都只係12倍左右，比永利上市時嘅14倍平。但細心睇原來呢部份只係現有業務嘅估值，若然計埋路氹金光大道第5、6期爛尾工程等舊業務，以上限定價的話將超過16倍，Double澳博控股（880）嘅7倍有多。
老外管理層不熟國情
不過保薦人高盛強調，呢次集資只係發展第5、6期工程同埋還債，完全唔關新加坡54億美元嘅濱海灣金沙事。奇就奇在當中有32%係舊股，母公司將可套現超過80億元，對佢連蝕7季嚟講，簡直係打番針「孖啡」止痛。
金沙現時流血不止，澳門員工擔心招股後會否大閂水喉，炒人減薪，慳番啲錢畀媽媽用？即使新擴建起好，點營運先係最緊要。要知道澳門賭業100%靠內地國策，但金沙管理層卻清一色係老外，佢哋最叻係起樓、搞裝修氣氛同表演項目，但如何了解中國國情、國民消費模式、同官方之間嘅人脈，必須靠地頭蟲引路至可事半功倍，發展先有持續性。
金沙營運有得改善，澳門股則早已聞金沙起舞，短線市場估值可能會有新睇法。幾隻濠賭股相對算係落後，全部都未破頂，金沙月底正式上市前，呢段將會係賭股蜜月期，但要小心其短癮性格。
仲有星期三內地公佈CPI、工業生產等經濟數據，到時又可以對經濟前景有新一輪炒作，要留意過埋呢一浸新股熱後，市場資金有冇缺口，因為投資銀行已跑夠數，小心蜜月假期提早完結。
胡孟青