東亞運仲有25日正式開幕，同香港甚少接觸嘅北韓亦有約100人代表團參賽，佢哋早前派專人實地考察住喺邊度，結果中會提供嘅3星至5星酒店全部唔啱心水，最後揀咗大霧山上嘅曹公潭戶外康樂中心。
曹公潭康樂中心每日一般收費64蚊包埋三餐，超平價錢相信唔係最大考慮。據講朝鮮代表諗住康樂中心位置偏僻，方便代表團自成一國喎，估計係唔想啲代表俾香港嘅資本主義「荼毒」。早幾年持續有北韓人多次喺北京闖入外國領事館要求政治庇護，北韓外駐機構都會喺外牆綑起有刺鐵絲網，防止人員走佬，希望曹公潭唔會喺柏林圍牆倒下20年之後，重現呢啲咁封閉嘅情景。