已經有11年冇喺紅館舉行演唱會嘅鄭伊健，將會喺下月18同19日喺紅館舉行兩場個唱，噚日佢喺紅磡都會海逸酒店舉行「鄭伊健友情歲月09演唱會」記者會，仲獲贊助商錶行送上兩隻合共200萬嘅鑽石手錶，大會又安排咗一個穿上比基尼泳裝嘅模特兒送上閃石羽毛球拍畀伊健，令伊健愛不釋手。
陳小春拖馬撐場
由於伊健嘅個唱反應唔錯，伊健透露有意開part2，仲會喺舞台上大騷佢苦練多時嘅岩石胸同六嚿腹肌。個唱上除咗老友陳小春會拖馬撐場外，伊健仲大賣關子話到時會有個性感女神「阿琪」出現，至於佢所指嘅「阿琪」係唔係舊愛梁詠琪同邵美琪時，佢就故作神秘咁話：「你哋自己估，半神秘，我私底下仲有好多舊感情，係周刊冇報道，加埋其他都夠開多一場請佢哋睇。」據知伊健所指嘅「阿琪」其實係舒淇。
女友唱歌得人驚
雖然提起舊愛時就表現避忌，不過講到現任女友蒙嘉慧（YoYo）時，佢就話YoYo兩場都有買飛支持，但佢就無意請女友上台合照，仲抵死話：「唔好啩！佢唔識唱歌，戥大家驚囉。」至於到時會唔會喺台上宣佈婚訊時，伊健就話人哋做過嘅事就唔會再做，記者提議佢可以爆料宣佈做爸爸，佢即刻話：「未諗過呢方面，婚都未結，點做爸爸呀？」