球隊贏波，球員賽後飲酒慶祝可謂家常便飯，侯城領隊菲爾布朗近期飽受壓力，難得球隊日前終於主場贏史篤城，賽後仲閂埋房門飲杯黑啤，做個真男人。
壽星仔希斯寧基奠勝
喺對史篤城之前，侯城已經連續3場聯賽未贏過，而且仲未入過一球，導致球隊今季一直喺下游掙扎；菲爾布朗亦因此而備受球會炒魷壓力，所以今次靠「壽星仔」希斯寧基補時階段入波攞3分，真係要飲番杯慶祝吓。
不過，菲爾布朗就冇出席賽後傳媒訪問，由助教賀頓代為回答記者問題，可能唔想聽到記者問佢贏波之後帥位保唔保得住呢類敏感性問題，影響飲酒心情。我求大俠當然戥菲爾布朗高興，但今次都係贏得好險，如果佢喺排陣方面繼續星期美點，下次想再飲黑啤慶祝，相信都要等一段時間囉！