股神以畢生最大注入股Burlington，買美國經濟的同時，亦買起咗市場信心，失業率升至26年新高仍被解讀為見頂的滯後數字，美股睇嚟仍係易升難跌。不過金價一再破頂，則反映市場對美元作為一哥貨幣的信心正逐步減弱，希望最終唔會釀成另一場信心危機，破壞得來不易嘅經濟復蘇。
押注鐵路當然係貪佢係穩陣嘅現金牛，貫徹股神謹慎作風，所以巴郡第3季業績至可以翻兩番，賺逾32億美元。
睇番股神張ShoppingList，上季最賺錢仍係美國運通同可口可樂，旗下仲有投資ConocoPhillips、強生、卡夫、P&G、富國銀行等，涉獵多個範疇，惟獨未有交通股。
美國監管機構近期雷厲風行打擊內幕交易，其實股神可能至係最勁嘅「先知」，金融海時，好似知道政府會以Toobigtofail為由救市，先同高盛定下實贏嘅鎖定股息協議；呢次買完鐵路，奧巴馬突然話加大投資基建，鐵路唔會冇份啩。
首選廣深鐵路
不過美國雖大，人口得3億幾，鐵路網已好完善，肯定冇內地高鐵發展咁一日千里。因為2012年，以北京為中心嘅鐵路網落成，到時由北京去全國大部份省市唔使8小時，計埋去機場等上機等起飛呢啲無謂時間，火車服務有可能逐步取代飛機，情況就好似日本嘅子彈火車，去邊都咁快咁方便。
市場翻叮舊概念，鐵路基建又熱炒，去年內地喺鐵路投資3375億元人民幣（下同），增長近九成，已營業路程8萬公里；今年鐵道部會再投放6000億元，到2012年當「四縱四橫」高鐵網起好，全國將有1.3萬公里客運專線及城際鐵路投入運營。按國家規劃嘅鐵路發展計劃，起好四縱四橫後仍有7000公里要搞，成個發展要使2萬億元，點會唔勁過股神喺Burlington的兩千幾億投資。
炒鐵路概念，唔係毛利極低嘅基建股，而係專注營運嘅廣深鐵路（525），佢係唯一喺中、港同美國ADR上市，有齊三地融資平台嘅國企靚「殼」，鐵道部要將起好營運嘅資產分離，捨佢其誰。
胡孟青