前些時寫及「仿奧巴馬」，讀者Lam來電郵抽秤，話文內關於芝加哥白襪隊「幾十年未入過季後賽」，係錯嘅。睇番轉頭，左丁山係講大咗，實則意思係講未入過WorldSeries，即使如此，仍然係錯。翻查紀錄，芝加哥白襪隊曾進入多次季後賽，一百○八年來有三次奪得「世界冠軍」（一九○六，一九一七，二○○五），正因為相隔咁多年先至取得第三次冠軍，所以給一般人嘅印象係攞冠軍難於登天，JayLeno幽米雪兒一默，原因在此。與紐約洋基隊比較，洋基啱啱以六戰四勝（四比二）擊敗費城，第七場唔駛打囉，這是洋基第二十七次取得冠軍，球隊總裁RandyLevine講得幾大聲呀："TheYankeeswon.Theworldisrightagain."如果你係白襪隊或Phillies擁躉，聽見就為之氣結。
氣結、氣頂，容易血氣上湧，血壓急升，好危險o架。星期三跑夜馬，廂房內遇到大董Ｙ，佢話睇左丁山得悉梁玳寧逝世，不勝感慨，原來佢在玳寧中風之前，就同玳寧吃過午飯，講飲講食，於是有感而發：「有得食就好食咯。」行轉背就碰到心臟專家Ｋ，想話向佢問吓血壓高、中風之常識，但回心一諗，專家Ｋ隻馬出場，有捧盃希望，無謂向佢提起血壓、中風呢啲好嚴肅嘅事咯。但記起專家Ｋ以前對左丁山講過：「吃飯不可過飽，大部份香港人只患營養過多，不是營養不足，吃得太飽不是好事。」於是面對自助餐之美食，一於忍忍忍，吃粥及幾塊魚生算數，返到屋企，上床前，量吓血壓先，好彩係正常，瞓得安樂。
第二朝，中貿林又來電警告：「如發現血壓高，要吃血壓藥，記住要吃一世，唔好一時食，一時唔制，否則後果自負。」中貿林啱啱去完東京見已經八十歲恩師，返到嚟知道梁玳寧過咗身，特別打電話嚟，有心人也。老人科醫生Ｓ亦向左丁山提供常識，血壓高，有壞膽固醇超標，除咗有中風風險之外，亦會增加患上老人癡呆症嘅機會，因腦血管之內如有過多粥樣蛋白，導致栓塞，會擠壓腦細胞，令記憶力日益衰退。聽聽埋埋，掛在心煩，唔怪得有咁多朋友去曼谷一間醫院驗身兼旅行。