鍾鎮濤（阿B）和女友范姜感情有增無減，繼囡囡鍾懿後，第二個愛情結晶品將會出世。日前腹大便便的范姜被目睹和外籍女士夾份坐的士，非常慳家，前晚阿B提到此事時竟說：「最緊要唔好俾人睇到佢上個男人車咪得！」似乎揶揄前妻章小蕙當年被目睹登上陳曜旻座駕幽會的情景。
鍾鎮濤、倫永亮及陳潔靈等前晚在將軍澳電視廣播城，為《超級巨聲》擔任評判，阿B表示一早已答允擔任評判，他認為這種比賽是好事，因為全部參賽者皆以唱功為主，並非以包裝行先。
「街坊互相照顧」
提到女友范姜日前腹大便便排隊等的士，被目睹和外籍女士夾錢坐的士歸家，原來兩人住同一條街，對此阿B笑說：「最緊要唔好俾人睇到佢上個男人車咪得，大家住同一條街，互相照顧，我哋搬嚟搬去都喺嗰條街，街坊個個都熟口熟面。」范姜可謂盡現慳家一面，阿B笑言：「慳嗰十幾蚊，但又使咗喺第二度。」
另外，問阿B其子女有沒有遺傳到他的唱歌細胞？他表示細女鍾懿（Blythe）最喜歡唱歌，日前更帶她到錄音室錄音。阿B說：「我之前同香港兒童合唱團合作演出，咁Blythe都係合唱團成員，大家一齊表演，估唔到我同佢把聲真係幾夾，所以捉咗佢去錄音，唱我當年個人發展後第一首廣東歌《閃閃星辰》。」
珍藏囡囡歌聲
阿B還親自擔任愛女的監製，至於她的歌聲會否收錄在他的唱片中？阿B表示自己何時出碟仍未知，但錄下乖女歌聲可以當作紀念珍藏。
同場的倫永亮錄影過程中不時說普通話，但中間又夾雜廣東話，部份內地或台灣參賽者根本聽不明他說甚麼，不過倫永亮卻聲稱好友林憶蓮曾讚他普通話相當標準。
採訪、攝影：StephenieYeung
