今個月係拔萃男書院創校140周年校慶月，校方噚日舉行賣物會，吸引5,000人入場，其中紀錄學校歷史嘅新書《役己道人：拔萃男書院歷史》，賣到$400依然好搶手。
男拔校長張灼祥同八方講，經濟好番，未來幾年擴校大計要嘅1.5億元，有信心善款陸續有來；今年有兩位舊生各認捐2,000萬，喺男拔附屬小學讀書嘅葉傑全亦捐出1,000萬，成績好過舊年。本身係中華廠商聯合會會董嘅葉傑全有鋪捐錢癮，幾年前佢喺一個大閘蟹宴，被當年理大校長潘宗光真情打動，答應豪捐3,000萬，計番嗰時食咗兩隻蟹，即係每隻要1,500萬。張灼祥冇諗過請善長食大閘蟹，但會陪打幾場高爾夫球喎。