佘詩曼在今年的無綫台慶頒獎禮有份提名視后及最喜愛的電視女角色，雖然她正趕拍新劇，但昨日在將軍澳出席義賣活動全程表現風騷，更突然表示已作好做媽媽的準備，跟媽咪學廚增加本錢。
佘詩曼、薛家燕和姚嘉妮昨日在將軍澳出席慈善義賣活動，阿佘今年憑《宮心計》和《絕代商驕》兩劇分別在無綫台慶頒獎禮被提名最佳女主角和最喜愛的電視女角色，即使她正趕拍新劇《天與地》，昨日在義賣活動上表現風騷，穿上斗零踭的她罕有地與一班小朋友跳舞。
阿佘更在台上表示有做媽咪的準備，事後問阿佘是否準備做媽咪？她笑說：「家燕姐同姚嘉妮都係媽咪級，我只係配合佢哋，我反而學煮嘢食，媽咪話女人最大嘅本錢係識得煮飯，每次返夏威夷，媽咪都會過幾招畀我。」
家燕執番條命
問阿佘曾否為男性朋友下廚？她說：「咪係我細佬同阿哥囉，10幾年前都試過煮嘢食畀男朋友，嗰陣仲係整心形牛扒，我啲廚藝都OK，只係平時少練習，我都希望可以用得到。」
此外，有指薛家燕在台慶劇《富貴門》的戲份少而不獲提名視后，家燕姐說：「嗰陣我唔舒服要入院，本來劇情話我會死，但係監製覺得唔好，叫我休息一陣再開工，我喺中段係冇乜戲份，都覺得好可惜，但總算執番條命。」
收視麻麻失望
《富》劇播出後收視麻麻，更被指劇情犯駁，家燕姐說：「好多劇集都會好犯駁，唔係又點會有戲做？雖然收視方面我都有啲失望，但係我有信心遲啲會好。」有指大女石祐珊帶男友見家長，家燕姐笑稱男方只是美國的朋友，不會阻止女兒拍拖。
採訪、攝影：何慧斯
