【本報訊】上周五開始「任飲任攞」訪港之旅的林丹，昨日出席金行宣傳活動後黑面宣佈由於太累，將退出明日開始的香港公開羽毛球超級賽；另外，衞冕女單冠軍的港將王晨，以及丹麥的迪基同樣宣佈退出，令今屆超級賽星味大減。
身體吃不消今返北京
林丹昨早探訪安老院及幼兒中心時仍笑臉迎人，緊張地問受訪者是否聽得明國語，還親切地慰問他們，以及握手拍照。他於中午表演活動繼續搞笑，偷偷於雙打時離開球場，讓中學生拍檔單獨與陳金較量；不過「超級丹」可能連日來出席唔少畀面派對致玩得太累，飯後出席金行宣傳活動時態度突然180度轉變，不但完全沒有購物，甫進店便坐下休息；而且笑容牽強，更於活動結束後黑面透露退出超級賽：「身體有點吃不消，明日會回北京，專心準備月中上海的公開賽。」
「超級丹」在港短短3日，共出席4個商店宣傳、3個慈善及兩個表演活動。雖然他上周六於修頓室內場館的表演賽神情輕鬆，一度搞笑冧觀眾；但他每日都要晨早開始活動，身心疲勞。國家隊今次特別允許林丹退賽，他今午12時原定與謝杏芳等出席的錶行活動，已宣佈取消。
對手索尼將自動晉級
香港羽總主席湯偉掄表示林丹可能因退出而被罰款：「罰錢對林丹只是小事，最可惜是許多香港球迷都不能看他比賽。」林丹原於周三於首圈與世界排名第9、印尼的索尼對壘，湯偉掄表示按照慣例應該不會重抽對手，索尼將自動晉級。
花絮：陳金搵到「自己」
中國羽毛球隊噚日一早去安老院做探訪，玩完遊戲就走入啲老人家嘅房間派福袋，點知陳金（圖右）就喺嗰度搵到「自己」，原來嗰位年屆93歲嘅婆婆（圖左）同佢同名同姓，隊友見狀，仲講笑咁叫陳金留喺度同陳婆婆一齊住㖭。
花絮：杜婧見「四方城」手癢癢
北京奧運金牌得主杜婧（圖右），噚日同隊友喺安老院做探訪嘅時候，適逢有班婆婆喺度大戰「四方城」，佢就即刻忍唔住走埋去其中一位婆婆隔籬幫吓眼。唔知杜婧平時唔使練習嘅時候，又會唔會約埋隊友打吓麻雀咁呢？
花絮：于洋買得心頭好
連日嚟出席咁多個活動，中國羽毛球隊都疲態盡露，噚日去到金光閃閃嘅珠寶店都勾唔起佢哋買嘢嘅意欲，只係得兩名女將杜婧同于洋（圖左）揀到合共價值兩萬幾蚊嘅心頭好。
