視民望如浮雲嘅煲呔民望急挫，唔知算唔算好嘅唔靈醜嘅靈。好耐冇更新網站嘅佢終於化悲痛為力量，噚日貼文，講到10月底即係民望急瀉期間，出席咗一個「正能量」音樂會，大讚好多肢體或心靈上有殘障嘅人冇放棄自己，憑住努力奏出動人樂章。
煲呔仲引述當晚演出嘅一節歌詞，話天色或有陰暗，但千祈唔好忘記太陽總喺雲層後面，要以此共勉之。似乎佢都痛定思痛，唔想好似老董咁腳痛落台。
梁振英暗插唐唐
至於日前喺網頁暗踩煲呔嘅梁振英，就繼續喺網誌發功。佢今次改向特首跑馬仔遊戲勁敵唐唐進攻，勁插皇后像廣場長亭頂上嘅大型戶外廣告招牌完全破壞廣場設計，聲言如果喺人文氣息嘅環境內加入商業廣告，而大家又視若無睹，將來嘅西九就冇希望，明踩主理西九嘅唐唐一腳。