旅遊界立法會議員謝偉俊（Paul）噚日出席《城市論壇》，白姐姐亦有到場支持。論壇後阿Paul接受學生訪問，手執一個迪士尼袋嘅白姐姐冇企埋一邊唞凉，而係同傳媒講番對上海起迪士尼公園嘅高見。感情問題專家白姐姐話，港府同迪士尼嘅關係，似大婆同老公，家迪士尼決定喺上海起多個，情況直情老公包二奶咁。
白姐姐指香港做大婆，由於已經獻咗身畀男人，如果家仲成日追問個男人有乜嘢畀番自己，隨時只會逼到個男人去西安包三奶，「個男人仲可以話，自己其實已經有嘢畀番你，仲有幾億㖭，精子呀！」語出驚人嘅白姐姐雖然狂插香港迪士尼，但早排好有愛心，用自己個「盡訴心中情基金」，帶咗班小朋友去迪士尼玩，嚟緊仲計劃聖誕節帶老人家玩多次喎。