現年37歲嘅台灣天后張惠妹同26歲嘅籃球員何守正自從發展姊弟戀後，一直都表現得好低調，好少見到阿妹同男友拍拖出現。不過，一對戀人點都要見面sweetsweet，因為過多幾日阿妹就要飛去日本為即將舉行嘅巡迴演唱會綵排，要同愛郎分別10幾日。
手忙腳亂
臨別依依，前晚阿妹同何守正當然爭取時間見面，但佢哋唔係二人世界，反而約埋阿妹經理人陳鎮川同造型師一齊喺台灣嘆日本料理，點知咁啱被撞破，搞到兩個即時不知所措，手忙腳亂。
未被發現時，阿妹同男友並肩坐喺榻榻米，但因為何守正對腳太長，所以要將雙腳伸到阿妹後面，十足大爺咁款，認真識嘆。
當記者一個箭步衝去影相時，阿妹第一時間拉低頂帽遮住個樣，原本着住背心嘅何守正即刻着番件T恤，仲將阿妹一擁入懷，用身體遮住佢以免被攝入鏡頭，行為相當之man，唔怪得阿妹千揀萬揀對佢情有獨鍾啦。阿妹經理人陳鎮川噚日喺電話話：「只是朋友之間小聚一下，很休閒地吃飯。」
