自從老公陳棣榮9月初因十二指腸潰瘍穿孔入院接受手術後，陳方安生即時放低手頭所有工作，同一切公開活動sayno，全心全意照顧丈夫。直到近月丈夫病情轉趨穩定，陳太噚日朝早至抽出空檔，去咗山頂為公民黨嘅步行籌款活動做主禮嘉賓，仲捐錢力撐公民黨推動環保同愛護動物政策。
一眾傳媒得悉久未露面嘅陳太現身，噚日講完一輪又一輪，到籌款起步後，都仲有電視台記者一邊抬住部機，一邊追實陳太扑咪。一身醒神粉紅搭白色運動裝，配上一對黑色運動鞋嘅陳太，對住記者反覆提問好有耐性，招牌四萬笑容長期供應。
快閃返醫院陪老公
八方噚日問候陳太佢丈夫嘅近況，佢話老公入咗醫院兩個月，家已經康復緊。據講，陳生原來先後住過瑪麗醫院、法國醫院同聖保祿醫院，陳太噚日仲透過傳媒向一眾醫生、護士、醫務人員講句，多謝佢哋對陳生嘅悉心照顧。
咁陳生幾時出得院？陳太噚日就坦言未知，話要等醫生批准，陳生至可以出院，又話佢自己都好心急。陳太亦講明，話只要陳生身體恢復健康，佢就會恢復工作，包括去唔同學校巡迴演講，佢做主席嘅民間策發會亦繼續討論政改，「我會繼續盡我能力推動民主，製造一個真正公正、和諧嘅社會。」陳太致辭時，話唔會講太多民主嘅嘢，但個心終始離唔開普選議題，講唔夠兩句，就話無論人定動物，都一樣需要民主。
同場拖住狗仔嘅動物地球總幹事黃繼仁好有同感，話民主對養狗人士的確好重要，指養狗人士經常面對鄰居、大廈管理員等歧視，而生活、住屋其實都同政府政策有關，好多時都要靠公民黨之類有心政黨組織幫手，「唔係我哋吠兩句就得」。最搞笑係隻狗仔聽到後，即時吠咗兩聲，搞到陳太同在場嘉賓都笑咗出嚟。話明只係抽出空檔時間，冇幾耐陳太就快閃離開山頂，趕住買嘢食去醫院陪老公。
mailto:[email protected]