有人儲模型車會理論多多，算盡先買；有人則愛好先行，喜歡就買。作為Fans，唔炒賣都總想心愛珍藏能保值，不過模型車廠老闆陳長有教路，要醒目「投資」，最緊要學識多面睇，尤其嚟緊HUMMER喺內地設立生產線，肯定更廣為人識，極具升值潛力。
記者：許維雅
攝影：陳盛臣
鳴謝：國際車迷會（26289911）
升呢靠國內市場
今次訪問嘅車迷的確好唔同，因為第一次同人做訪問係有PowerPoint講解，內容其實主要係汽車文化歷史，更係呢10年來運豪集團副總裁陳長有努力搜集嘅資料，佢話下個目標就係將此集結成書出版。一個不折不扣嘅生意人，用心睇車亦坦言係職業所需，「公司業務有70%資源都投放喺模型車上，20年前，老闆畀咗幾十架模型車我，要我拆開晒之後砌番埋，原來係咁複雜咁過癮，慢慢開始引起我對汽車嘅興趣。」已經62歲嘅陳長有身兼足運、職訓、廠商會等幹事之職，更閒來兼任理工大學講師講汽車文化，魄力十足，更學懂與時並進，開口埋口話要升呢，「做模型車生意同做收藏家一樣，要多留意新聞時事、收集多啲有關資料先可以升呢。好似HUMMER遲啲有機會由四川生產，相關模型車一定會有機會喺內地大熱，呢啲就係時勢，要懂得把握，所以HUMMER模型車都成為我近排嘅最愛。」無錯，真車市場都放眼中國，想模型車保值都不得不多窺探國內市場口味。
開邊瓣睇市場
20年來擁有多個原廠中華區代理，生產過無數款式模型車，珍藏曾經多達2,500架，款式主題五花八門，歐美式棺材模型車仔就已叫人夠晒驚喜。「係呀，呢兩部棺材車有埋棺材，好得意，喺美國不知幾好賣，所以模型車保唔保值都好睇唔同市場嘅文化同需求。好似歐美地區汽車文化深厚，佢哋更講求模型車手工同結構細緻程度，工程車如拖拉車、鑽油機等喺外國極受歡迎，因為parts夠多夠複雜，設計要更精密，我嘅第一桶金都係由工程車開始。」不過有時多人揸又唔等於多人收藏，中國就係一個好例子，「中國汽車文化未完全成熟，家都係處於成長階段，最受歡迎模型車分兩類，第一類係講時機嘅，好似東風金龍同HUMMER，第二類就係名牌，三大熱係Benz、法拉利同寶馬。但賣得最多反而係6至33萬元價位嘅真車，如QQ、紅旗、豐田等，偏偏呢啲模型車唔值錢，因為數量太多。」原來要成功炒賣模型車實在大有學問。
1:18HUMMERH2
HUMMER仔跟真車一樣可以打開所有門，引擎造工仲細緻非常。
1:34汽水車
載住一支支樽裝汽水，市面幾乎絕迹。
軍用迷彩HUMMERH2
落咗軍用迷彩後，H2更具力量感。
1:18紅色FERRARIFXX
車身膠片製造都取埋專利，難怪可以睇車內部份都咁清楚，售價$698
得意收藏
史上首部
由美國訂回來嘅「世界第一車」，FRANKLINMint生產嘅1886年第一部現代汽車Benz一號。
百無禁忌
棺材車都有模型，1959年Cadillac（右）及1921年FordModel-T（左），連埋棺材仔。
超級袖珍
喺1:125貨櫃車前面嘅「鼻屎車」係陳長有曾經研發嘅1:256的士仔，本來打算兼作女性飾物，但最後放棄。
科幻照儲
陳長有十分欣賞《智能叛變》入面RSQ模型車。
保值5大條件
陳長有提醒大家想模型車保值就必須符合以下5大條件。
1.要有標準比例、真實車型，必須符合95%像真度要求。
2.一架模型車組件越多就代表手工越精密，增值機會越大。
3.模型車一定要有原廠品牌授權License，質素先有保證。
4.注意生產數量，最好限量發行，當然越少越好。
5.有歷史價值，可以升值好多倍，但閒閒哋要等幾十年。