論排名及近況，周日英超重頭大戰的主角車路士及曼聯不相伯仲，但紅魔近6次到訪史丹福橋球場都無法取勝，最多打和，便知為何車路士被看高半線，開出讓平/半盤兼低水。事實上，車仔前後線眾將甚「弗」，相他們可以挫紅魔，開上盤。（球賽編號：星期日46；now632及660台今日11:59pm直播）戰鬥員A
兩隊不約而同在上周中的歐聯分組賽都打和終場，從而取得出線資格，而雙方都在陣容上未派出最強陣，為今仗聯賽大戰作準備，尤以曼聯為甚，只讓莊尼伊雲斯、法比奧達施華及馬捷達等後備兵應戰，結果艱辛兼有運地迫和莫斯科中央陸軍。
里奧養傷替補更曳
不過，自從老將傑斯受傷後，曼聯的攻擊點變少，只靠貝碧托夫及朗尼在前線爭取入球，中場的入球能力的確因基斯坦奴朗拿度離去而減弱，兩翼路爾斯華倫西亞及拿尼只能做到助攻的角色，但今仗面對邊防頗硬淨的車路士雙閘艾殊利高爾及伊雲洛域，料得不到優勢。
中堅里奧費迪南受傷要再休養下，曼聯中路防守出現更多變數，就算尼曼查維迪趕及傷癒復出，其中路拍檔將會是布朗或者莊尼伊雲斯，並不可靠；從早前作客利物浦輸0:2一仗，面對具級數的費蘭度托利斯，曼聯的中路防守便變得不穩陣，今仗遇上車路士的杜奧巴，以該科特迪瓦前鋒近況之佳，紅魔唔易頂得住。
主隊雙箭頭大勇
車路士現時只有保辛華一名正選球員有傷，但替補的伊雲洛域或比列堤應不成問題，前線杜奧巴夥拍安歷卡，尚有狀態不俗的沙洛文卡勞作後備前鋒，前線組合調動頗多變化，甚至打主攻的3箭頭都不成問題。
至於中場球員的級數，車路士也勝一籌，艾辛及波歷克的搶奪中場控制戰局能力，的確勝過卡域克、費查及史高斯的曼聯組合，只要林柏特保持水準，在進攻方面能夠支援一對前鋒，是有能力可助車路士主場先勝一仗。「讓球」開出車路士讓平/半，信他們可挫紅魔，捧上盤。
車仔近年3迎紅魔未輸過
21/09/08 和1:1
史高拉利領軍後第一次鬥曼聯，雖然被朴智星先入波，但沙洛文卡勞完場前10分鐘入波，令「大菲」不致丟臉。
26/04/08 勝2:1
你大可說是梅開二度的波歷克「個人騷」，而連「霉友」舒夫真高都回防救空門，紅魔豈能不俯首稱臣？
09/05/07 和0:0
06/07球季顯然是曼聯的天下，當時爭標大局已定，但車路士仍在尾二的一輪聯賽悶和對手，保全季主場聯賽不敗身。
星期日46
車路士vs曼聯
半全場：主/主
盤口：車路士讓平/半
讓球：上盤 2：0
《花絮》
A高爾拒賀朗尼添丁
新任父親嘅朗尼為咗慶祝，妻子高蓮上周一誕下8磅重嘅兒子Kai（佳佳），就決定將兒子個名紋在腰背後！之不過佢嘅英格蘭隊友、車路士守衞艾殊利高爾（A高爾）就講明賽前唔會恭喜佢，皆因佢話兩隊係宿敵，兩隊亦都想贏，但係A高爾話賽後或者會補講番嘅！
阿巴擬售球場冠名權
車路士縱使有油王班主俄羅斯嘅阿巴莫域治撐腰，但喺金融海嘯為咗賺多啲贊助費，亦考慮效法英冠球隊嘅紐卡素，出售球會主場嘅冠名權。車仔新任總裁古尼（RonGourlay）話歡迎各贊助商將網站、公司名稱出現喺車路士嘅主場史丹福橋球場！
費查自詡「大隻仔」
曼聯中場費查喺上周歐聯主場賽和莫斯科中央陸軍後足踝受傷，但佢話自己有足夠狀態出戰今仗。佢為咗同其他英超球隊力量型嘅中場較量時唔輸蝕，最近仲專登去舉鐵，佢笑言自己家係「大隻仔」，肯定冇人喺中場可以阻到佢喎。
肥安大戰前改寸紅軍
車路士大戰曼聯，一般預期車仔領隊安察洛堤會挑釁紅魔鬼，點知安帥反而集中火力向利物浦落井下石；安帥講爭標形勢時表示：「我覺得阿仙奴有機會爭上第1位；呢個時間我哋唔擔心利物浦，佢哋已經落後甚多。」