上市利豐集團第三代掌舵人馮國經罕有接受電子傳媒訪問，噚日畀面老友周梁喺有線節目亮相，仲披露咗個令人O嘴嘅秘密。
周梁問馮國經，點解用電郵聯絡佢，永遠都唔回覆，馮國經自爆，已經冇用email好多年，佢解釋早喺80年代中期，當時佢搞好多高科技生意，已經經常用電郵，每日甚至要用成兩個鐘頭清理、回覆電郵，十分花時間。
覆SMS快啲
有次佢返母校MIT同教授傾開呢個現象，教授估計五年後佢要用多一倍時間至清得晒電郵，再過多五年，耗時要倍增，馮國經話當時聽到教授預言，覺得自己根本冇可能花咁多時間睇電郵，所以決定從此唔用電郵，寧願打電話或用voicemail。
喺人人都用電郵嘅時代，唔用形同失蹤，馮國經話用電郵搵佢都得，但係就要耐啲先覆，反而覆SMS快啲。做大老闆就有呢個好處，喺利豐打工嘅人，相信唔敢學老闆咁唔用email。