舊年香港發生郭氏兄弟不和，鬧上法庭之事，轟動一時，外電亦有報導。今年印度一間巨企Reliance亦因為股東兄弟不和，大打官司。通常家族生意去到第二代或者第三代，只要有一位兄弟提出異議，要求分家，就會觸發戰爭，官司少不了。唔好以為東方人特別有此傾向噃，其實古今中外情況完全一樣，總之兄弟在父母養育之時，點都會服從父母之命，聽指示，但到咗父母不在，大人大者各有思想不同之處，希望分開，各自獨立，係好自然嘅一回事，例如「杜瓊斯」之原來股東家族，經過幾十年甘苦與共，前年咪又拆伙，賣咗畀梅鐸嘅新聞集團。到梅鐸不在之後，「新聞集團」相信同樣會由兄弟姊妹分拆！比較罕有嘅係瑞典有兩個大家族Wallenberg與Bonnier已經去到第六代至第七代掌舵人，仍然屹立不倒，認真罕有。其中Bonnier家族自十九世紀初就從事出版事業，直至如今。一位第六代家族代表Bonnier十幾年前來港，瑞典賓架Ｇ特別安排代表與左丁山在香港會吃早餐，點知左丁山揸車自紅隧過去，遇上特殊塞車情況，寸步難行，焦急如鑊上螞蟻，卒之遲到咗一小時，趕到香港會，氣喘兼面紅耳熱，乜面都冇晒，此乃左丁山自懂事以來，最瘀最尷尬嘅一回事，話過以後朝早七時後過海唔行紅隧，星期日早上除外。嗰位代表仍然好有禮貌，好客氣，當日請左丁山乘直昇機環遊香港，請左丁山講解香港情況，不過以後就唔再聯絡咯，仲連累埋賓架Ｇ㖭，至今耿耿於懷！
扯到咁遠，皆因見到一篇報導，紐約一個伊朗移民家族Elghanayan，六十年來在紐約靠地產發跡，佢地三位兄弟主持，今年三月三日母親逝世後，三位兄弟立刻分家，Henry，Fred，Tom三人已經六十歲過外，要各行各路，佢地雖然關係不如前，但決定唔上法庭打官司益律師，三月四日就在家庭律師樓擲毫決定。Henry抽到一個信封，內有一條攪咖啡膠棒，揸住條棒就可以揀先，律師拋出硬幣（coin），Henry嗌字，硬幣落地後，果然係字，於是預先分為三份嘅資產，包括位於紐約與華府嘅8000個住宅單位與九幅地皮，就由大佬揀咗一份先。如此分家族資產方法，比較文明，唔知其他大家族兄弟會唔會仿效呢？