運輸署噚日拍賣車牌，一個唔係咁起眼嘅無字頭131，竟然引起激烈爭奪，最後以100萬元成交，全場嘩嘩聲。
運輸署近排拍賣車牌成交價低迷，喺咁嘅市道下，人人忍手可以理解，對上一次受注目過百萬元成交車牌，係3月時英皇老闆楊受成以120萬元買自訂「JY」車牌，送畀愛將容祖兒賀佢入行10年；傳統車牌方面，無字頭2318今年2月以170萬元成交。
131諧音「一生一」，睇落唔算好特別，有買賣車牌行家指131數字工整，值成百萬元都唔出奇。噚日次高成交價車牌係好意頭嘅1168，以25萬賣出，買家係商人，希望風水車牌轉運，可以帶旺生意。