資本策略（497）股價細奀，但禾稈冚珍珠，唔少超靚物業，炒大升值，又炒靚業績。資策沙士期打後，累積咗唔少優質筍盤。以告士打道國衛中心為例，業內估計，集團應佔總樓面面積26.25萬平方呎，成本價15億前後，圍起每方呎都係5700蚊。呢期樓市火熱，又好保守咁以每方呎1萬蚊再秤，物業賬面值26億銀，兼可以為資策帶嚟超過10億銀升值。資策成間公司市值，都係得17.8億銀，資策平到痹。估計連埋尖沙嘴及上環等物業重秤，資策NAV0.65元，現價0.218元折讓66%，亦好吸引。
資策上個月發盈喜，話半年度預期盈利會有明顯改善，又多個賣點。博資策升穿1年頂0.305元，潛在回報40%過外，但折讓仲講緊有54%，實情仲有唔少收窄空間。
中視金橋破旗向上
中視金橋（623）啱啱抽穿支上升旗，火熱辣炒一轉。中視金橋最新揸住現金7.1億港銀，又冇負債，每股淨現金1.26元，淨現金比率50%過外，係現金牛一族。又中視金橋貴為央視電視廣告時間嘅最大私營銷售代理商之一，加埋阿爺谷內需政策，中線業績應該睇好，明年度純利1億銀人仔，PE得9倍單位數。短打博升20%到2.40元，PE都係得10倍多少少。
錢雋