當今女生入大學佔盡優勢，男生唔知去咗邊。老總Ｃ食午飯時講：「中大新聞系學生嚟我哋報社參觀，十幾二十人之中，只有一位男生。」老總Ｓ搶住講：「港大新聞系學生來報館參觀，直情係全女班㖭！」左丁山不禁失笑，對幾位報館老總講：「你哋可能係最後一代全男班老總。」大家同意噃，認為佢哋退休之後，新聞界上上下下由女生接班，極有可能，主因就係「記者編輯製造廠」（大學新聞系）已由女生佔據咗。
其實唔止新聞系，法律系、會計系、心理系、中文系、歷史系呢啲系別嘅學生，女生佔壓倒性優勢，醫學院嘅女生超過五成，故此未來我哋見到嘅專業人士──會計師、律師、心理治療師、醫師──全部會係女生掛帥。昨日講及商界嘅女強人不易為，漂亮女強人更承受額外感情壓力，但大勢所趨，外國著名大學亦逐漸女多於男，未來中環大企業，由女強人接管，理所當然，反而男生要在女專業人士充斥嘅環境之中，脫穎而出，甚為不易。
女生主導，對企業有何影響？約十年前，一間「四大」之一嘅會計師行主管人力資源嘅女會計師Ｔ就同左丁山講：「我係女人都覺得幾麻煩，三十幾歲左右要開始挑大樑之際，啲女士就話情願返屋企湊仔女，多啲時間在屋企，唔想升做部門主管，搞到我要周圍搵男生去中國闖關，我幾希望請多啲男仔，但係幾難揀到。」呢啲係以前嘅情況，今天不知如何，大概有資格嘅女士，數目更加多咗，純統計機率，女生接班更容易一啲。
上星期二到跑馬地嘅三Ｃ會吃晚飯兼開會，仲係左丁山第一次，點知離開中餐廳落到地下，有兩名幼童在大堂奔跑，後面有兩位菲傭跟住，左丁山當然立即停步，企定先，以免撞到細路。企定一望，唉吔，竟然見到大學師姐Ｙ，兩位幼童就係佢嘅孫，俾佢嗌住，然後見到師姐Ｙ媽咪，老人家十分精神，亦見到師姐Ｙ嘅乖女，左丁山話：「恭喜伯母，四代同堂在此飲咖啡，一家夠晒安樂。」問Ｙ千金在那裏上班，千金Ｙ話：「湊住兩個仔，唔做銀行咯！」順口問埋：「你細妹仲係唔係在WKLL律師樓呀？」師姐Ｙ話：「佢生咗仔，返咗屋企唔做律師咯，唞吓先啦！」因而想起校友Ｌ嘅千金結婚之後，唔肯再做朝九晚十嘅律師，亦辭咗工。三位女士同係名校出身，留學英美，兩位係律師，一位係i-banker，同樣為咗家庭而辭工，不禁諗起十年前會計師Ｔ之言，但wheretheboysare？