梁慧恩（Viann）噚日喺灣仔會展以一襲超低胸婚紗為一間婚禮統籌公司宣傳，係代言人身份嘅Viann，一心要揮低兩個來勢洶洶嘅嘉賓呂慧儀同高海寧，所以首肯穿着入行以來最性感嘅超低胸裙示人，成為焦點佢就梗係開心，不過，佢又好擔心第日報紙見街，拍拖1年嘅男友會鬧爆佢，佢話：「我影呢輯相佢已經唔鍾意，佢話搞錯呀！攞出來畀人睇！聽日諗住晨早約佢飲茶，等佢冇機會睇報紙，如果唔係佢睇到眼火爆，一陣鬧分手，分手仲要賠償。」
高海寧冧鄭元暢
出名有料又會行性感嘅呂慧儀同高海寧就比較收斂，呂慧儀就好認同，仲係咁讚Viann好勁好靚，佢話：「我覺得着婚紗係要靚同性感。」講到好姊妹徐淑敏就快出嫁，問佢有乜嘢準備，佢話：「冇呀，我都係準備去。」高海寧話自己都有份去，所以佢一直好專心喺隔籬聽有乜嘢人去做兄弟，當佢聽到呂慧儀話有鄭元暢時，佢即刻叮一聲話：「吓？真係有鄭元暢！」然後話：「我最近有睇佢啲劇嘛，我第1輯、第2輯都有睇呀！」似乎對佢好冧。