政改大龍鳳揭開序幕，立法會議員噚日分批同煲呔會面，政府「翻叮」05方案出台應該冇乜走雞，當年市民已經啃唔落，整色整水「翻叮」，八方相信市民都唔會接受。煲呔講過要玩鋪勁，民主黨噚日卻十分蝦碌，在政府總部舉紙牌「爭取2012雙普選」，竟然企錯位，變成「爭取2102雙普選」，阿爺見到，真係開心到暈低都似。
八個民主黨議員噚日各自拎住張紙，打算砌成「爭取2012雙普選」畀記者影相，點知佢哋將口號由右至左排列，記者話有啲唔妥喎，因為阿拉伯數目字應該由左至右讀，亂咁企位變成「爭取2102雙普選」，相差90年，即係要等多成個世紀先有雙普選，好大鑊啫，幾個議員先知碇走番啱位合照。
閂埋門見泛民冇乜火花
好彩呢個只係「臨時性」示威紙牌，輕易撥亂反正，否則民主黨真係爭取2102雙普選，八方相信煲呔一人頒一個大紫荊畀佢哋都捨得，白鴿黨功在家國，北京亦唔會忘記佢哋貢獻嘅，他朝做個政治花瓶都唔係冇可能。
民望一浪低於一浪嘅煲呔，噚日見完議員後好似收晒火，對記者和顏悅色，唔再鬧傳媒無中生有、惡意中傷，至於佢係咪真係痛定思痛，知錯而改，就要觀其言、聽其行，八方聽聞佢閂埋門同泛民議員見面時，態度亦好平和，雙方冇乜火花。由於冇鏡頭影住，社民連留力，僅毓民一人赴會，據講會上毓民只係重申會推動總辭，冇發火砌煲呔不該拖延雙普選。
泛民見煲呔平靜散場，其他保皇派更加淡然無味，自由黨分裂後，政府巧妙咁將三個退黨議員組成嘅「經濟動L」編排同民建聯、工聯會一齊見煲呔，自由黨三個議員則同其他獨立議員一組，有人笑言如此安排，可能反映喺煲呔心目中，「經濟動L」林健鋒、梁劉柔芬同梁君彥三票更加保皇，「效忠」程度已達根正苗紅級數，自由黨劉健儀、張宇人同方剛可靠度就冇咁高喇。
mailto:[email protected]