電腦已成為人類生活不可或缺之物，而且在精密科技之下，電腦產品越出越靚，價錢亦都相對實惠好多。有散戶透露，佢有個大陸老友在北京某大型電腦連鎖專賣店做推銷員，冇底薪，只靠賣電腦賺佣（大陸人叫「提成」），居然可以月入過萬元人民幣！
星俠相信該位報料散戶無「吹水」，不過係咪每個月都咁好搵，佢再冇詳細講。呢位散戶前排專誠上京參考人家點樣經營電腦專賣店，可謂實地做過考察。一個地方經濟騰飛得緊要，先至有條件造就普通打工仔收入上升，家陣在大陸首都賣電腦都搵到呢個收入，唔知有無香港人想返大陸發展？
內地電腦龍頭聯想集團（992）剛公布中期業績，營業額跌11.5%至75.6億美元，純利按年跌72.3%至3707萬美元，每股盈利0.42美仙，派中期息1港仙；若單計第二季，純利則按年大升1.3倍至5308萬美元，營業額則跌5.3%。
睇落聯想份成績表，其實冇乜驚喜，估計該股由10月份展開升浪後市有可能打回原形。聯想上月初開始炒起，一度曾升至4.9元創52周新高，不過未能突破5元。其後調整之勢明顯，又剛派完業績，估計後市在3.8元至4元水平有得撈，買貨不必心急。
方星俠