浮誇的80年代如厲鬼般經常去又來，當頭棒喝最應一句「開口中」是：Neversaynever！恐怕誰也沒資格替80's蓋棺，不過，80's衍生的好事好回憶也着實不少。烈/潮/rock女何超儀，借問聲80年代你在哪？搞緊乜？一身絲絲點點80'slook的何超儀，由「冇得揀」的奄悶開始至自主「開心大發現」的狂喜，何超儀豁出去夠膽死，雙手迎接80's的回歸！
撰文：梁錦貞
音樂 蒲DD打壞樁
80年代頭，何超儀正值初中時期，音樂與時裝啟蒙都是家姐安排。先談音樂，何超儀指她最愛的品種是電子、rockn'roll及跳舞音樂，那個年代家姐們愛蒲DD，無從選擇下，跟着聽的就是DonnaSummer、VillagePeople、ONJ（奧莉花紐頓莊）、IreneCara……
「俾同學笑死」
超儀笑說：「去到加拿大留學，同啲同學交流係聽呢啲歌，俾人笑死啦！跟住佢哋介紹我聽HerbieHancock、Bauhaus、SonicYouth、MotleyCrue...嘩，我先知自己聽歌嘅樁真係打壞晒，早知有咁多好嘢，我就一早走去學彈結他，而唔係跟住家姐去DD同Graffiti、學阿梅（梅艷芳）同Leslie（張國榮）對住塊鏡跳舞，成件事遲咗十幾廿年先發生！」
時裝 名牌換平民衫
「情形一樣，80年代頭都係跟住家姐去買衫，嗰時係去Joyce、Green&Found等名店，見啲大人（家姐同阿梅）着乜我就照跟，嗰陣好興嘅係Versace、KansaiYamamoto、Byblos，都唔知係咪啱自己，又係去加拿大先有開心大發現。
「嗰時上機前幾日，媽咪親自幫我unpack行李，咪就係執晒啲Versace、KansaiYamamoto呢堆衫囉，一落機見到啲同學就知死得錯晒！點算呢？
自己話事
「哈，留學加拿大對我人生最緊要就係學識獨立同自己諗辦法，啲鬼妹對我呢堆我認為錯晒嘅衫竟然流口水，我就同佢哋交換，用Versace換件CottonUSA兩個月。喺加拿大一落機settledown晒之後，屋企人同親戚話不如落YoungStreet行吓啦！早有準備嘅我外面着件冇乜特別嘅褸，一除件褸，入面就係魚網背心、再入面係lacebra、下身係剪爛晒嘅牛仔裙、紫色leggings，屋企人見到我呢個look，所有人即時退後話：做乜呀你！
「以前喺香港嘅80年代joy&fun，我已經覺得好似180度海景咁闊，嚟到加拿大自己話事，個海景即時拉闊到有230度呀。我喺嗰段時間發現咗Birkenstock、Bermudapants、hoodie、Dessertboots！」
電影 鍾情迷離怪雞
「家姐佢哋掛住落DD跳舞，比較少睇戲，家人唯一會批准我同細佬自己出街係租錄影帶。
「初時都係睇大製作好似《E.T》同《星球大戰》嗰啲，慢慢再睇到《九個半星期》、《BlueVelvet》（藍色夜合花）等等，去到加拿大仲狂喜，睇咗大量添布頓（TimBurton），仲有《Brazil》（妙想天開）同《Tron》（電子世界爭霸戰）呢類cult片，奠定我鍾意睇迷離怪片呢鋪癮。」
看80's回歸：扮靚要搏命
「嘩！我要雙手迎接呀。家唔係淨係興80's，係百花齊放，everythinggoes，掂嘅音樂、時裝同電影唔係齋dub80's，而係以80年代嘅刺激心情同開放態度去處理。
「例如時裝，80's未返嚟前，有段時間好polished，個個有能力，肥妹就去瘦身，個個都咁着到靚一靚，家啲人着衫係襯番嚟，80年代嘅態度係撞番嚟！要有膽識，有勇氣同埋creative，話之你死！
「去蒲扮靚係要同人搏命死過，唔係點會覺得細個嗰陣落DD見到阿梅、Leslie對住塊鏡跳舞咁型！如果家嘅Volar有當年DD嘅氣氛，我即刻落去同你死過！」
攝影：葉君海
化妝：KaryWong
髮型：SamPangforHairCulture
服裝提供：Gucci、MarcJacobs、Altuzarra（JoyceBoutique）