獲頒諾貝爾物理學獎嘅中文大學前校長高錕，已經決定下個月親身去瑞典斯德哥爾摩出席頒獎典禮，喺美國定居嘅高錕夫婦呢排已經忙緊為個頒獎禮準備，諗吓着乜嘢服裝出席慶典之類。
最快明年才回港
當然，患上老年癡呆症嘅高錕，全部嘢交晒畀太太黃美芸決定，估計頒獎禮時瑞典嘅溫度只有攝氏零度左右，高太已經幫丈夫決定着件頂得凍嘅皮褸；佢本人屆時會代表丈夫上台致辭，佢話諗住着件有中國特色嘅旗袍出場。
高太話丈夫得獎之後，好多朋友都問佢哋兩夫婦會唔會返香港，高太承認都好想返嚟見吓老朋友，但係睇怕最快下年先至成行。不過，佢會率先將丈夫諾貝爾物理學獎送畀中文大學擺放，佢話反正個獎放喺屋企都冇人睇到，不如放喺中大展覽，等啲學生有個奮鬥動力更佳。
至於得到嘅70萬美元獎金，高太就話丈夫嘅醫療費用非常昂貴，加上遲早都要請個專人照顧老公，留番個錢傍身實際啲咁話。