如果我求大俠係包大人，肯定判朗尼呢個新任爸爸要杖打50大板。點解？呢位曼聯前鋒，寧願同老竇及外父去賭場玩天光都唔返屋企湊仔，你話佢係咪抵打。
朗尼嘅老婆高蓮喺禮拜一幫佢生咗個肥肥白白嘅男嬰佳佳（Kai），以為佢做咗爸爸後會好定性，查實仲依舊咁爛玩。佢禮拜二中午陪高蓮出院之後，高蓮就同BB返佢爹哋媽咪位於利物浦嘅屋企，而佢就返曼聯打對莫斯科中央陸軍場歐聯。比賽完咗之後，佢唔去外家幫高蓮湊仔都算，仲夠膽死去蒲天光，喺曼徹斯特市一間賭場玩到清晨6點。而佢仲好冇廉恥咁話，咁做無非係幫自己特訓。
帶老竇外父當擋箭牌
朗尼身邊嘅朋友咁講：「朗尼講笑咁講，話以後都唔慌喺夜晚有得瞓，所以玩天光係好好嘅練習機會。」朗尼明明去蒲就講成係為後日湊仔做準備，而且仲識得搵埋擋箭牌，真係好鬼蠱惑。
我求大俠就八到，嗰晚唔係得朗尼一支公去賭場玩，佢老竇老韋恩同埋外父東尼都有份去，一於三人行。有外父係身邊傍住，就算高蓮怪罪落嚟，佢都唔使一個孭晒啦。雖則佢做爸爸做得唔係好稱職，不過就真係好開心，仲將囝囝啲相send俾紅魔啲隊友。曼聯後衞艾拉就咁講：「朗尼佢真係開心到暈。」
囝囝好腳頭拆「車」有機
話時話，朗尼嘅心肝寶貝佳佳真係好腳頭，禮拜二晚睇住曼聯輸o架啦，但紅魔咁都可以喺落後1:3下迫和中央陸軍3:3。曼聯下個禮拜日會喺英超大戰車路士，呢場波佢哋有因傷要唞6個禮拜嘅中堅里奧費迪南缺陣，後防難免會中門大開。但係，佳佳佢咁旺，話唔埋可以帶挈朗尼隊波喺史丹福橋球場贏波呢！