港大學生會前會長陳一諤，上個月獲公民黨梁家傑聘請做議員辦事處實習生，由於諤少關於六四事件嘅言論同民主派冇乜偈傾，因此好多人知道佢到袋巾議辦實習後都十分詫異，噚日發生咗件事，更令人震驚。
有人發現陳一諤喺facebook上表示「我入了黨」，唔係啩，做實習未夠幾個星期就成功「滲透」公民黨？好多網友一時間難以接受呢個消息，認為公民黨隨便收新黨員太不該，社民連季詩傑隨即喺FB開新group，表態不歡迎諤少成為泛民一員，若然公民黨真係畀佢入黨，就同呢個黨劃清界線。
自稱留言被人加料
比較冷靜嘅網友話，諤少又冇說明入咗邊個黨，佢可能入咗民建聯啫，唔使咁緊張。由於事件瞬間鬧大，公民黨九龍東支部主席余冠威都要出面澄清，話查證後陳一諤無申請加入公民黨，暫時亦冇加入任何政黨嘅打算。
八方問諤少搞乜鬼，佢話今次俾人玩，有人喺佢留言上加料，鬧出呢次風波，十分無奈。