劉校長與麥小姐相戀之事，圈內早已有人知之，不過人哋談情，純屬私事，消息人士驚住呢段戀情一旦曝光，未知是否會見光吉，故此一早警告左丁山不要引爆，免壞大事，好嘞，直到家，卒之公開，劉校長開心到極，朋友戥佢高興。
四十零歲嘅廠商B留學英國，本身係工業工程師，十幾年前回港接棒，現在已接管全公司，佢爸爸只保留重大投資決定嘅否決權，逢跑馬就在馬場，輕鬆到極。廠商B睇到《蘋果》頭版刊登麥小姐相片，有驚艷感覺，竟然對左丁山講：「乜會計師樓拍拿有咁靚女嘅？又係英國讀書嘅㖭，點解冇青年才俊追咗佢嘅？劉校長只係識咗佢一年左右啫噃？」
廠商B曾係鑽石王老五，未結婚前起碼有半打女朋友，但佢有所不知，商界靚女又成為女強人嘅，係冇乜同齡男士夠膽或願意放手去追嘅，同年齡組別男士往往取易不取難，追女秘書都未必肯追公司內同係VP（副總裁）級嘅女MBA啦，呢啲例子屢見不鮮，左丁山有好幾位女性朋友，同是靚女MBA，同是總監（Director）級數，至令仍然單身，日日長時間留在公司搏命，忙於工作，無時間拍拖（或故意如此，以工作代替兒女私情），佢哋唔係未拍過拖嘅，多是談過一至兩次戀愛，唔成功，以後就無男士夠膽纏埋去，故此四十歲以上嘅標致女強人，如突然遇上一位成熟、成功型男士，一旦芳心暗許，感情進展會好快。
最近now電視電影台，不時重播《不道德的交易》，因而諗番起呢齣戲在港首映之年，活力先生有辦法搵到三位女強人，分別來自中環大企業，與我哋幾位男士一齊吃晚飯，討論甚至辯論羅拔烈福與狄美摩亞之關係，男女雙方講到幾乎拍枱，相當痛快。恢復平靜後，問番個人背景，女強人們好爽快咁透露，佢哋要在大企業向上爬，因丈夫未必了解，所以承受好大壓力，好似有兩位當時已經離咗婚，令我哋嘆息。現代社會，無分中外，漂亮女強人從來不易為。