郭富城近年和熊黛林可謂半公開的一對，可惜早前男方與王秀琳（Mango）傳緋聞，搞出複雜三角關係，但日前城城公開形容Mango並非自己緋聞女友，似劃清界線。昨晚Mango到中環出席活動時不甘示弱稱城城做郭先生，更指他「諗多咗」，擺明隔空發功。
自從郭富城被撞破秘密約王秀琳遊車河後，隨即傳出緋聞，令坐穩「城嫂」地位的熊黛林（Lynn）受威脅，而Lynn和Mango更不時隔空過招互寸。日前城城終於開腔聲稱和Mango根本不熟絡，完全不是外傳的緋聞女友，反而坦承經常和Lynn聯絡，出言和Mango劃清界線，奠定Lynn的城嫂地位。
澄清關係感輕鬆
昨晚Mango到中環出席眼鏡活動，對於城城跟她劃清界線，又稱她為「王小姐」，Mango一臉笑容地說：「我都有睇報道，係普通朋友。」城城指Mango「諗多咗」，她反問記者：「諗多乜嘢？」記者指是兩人有發展可能，Mango即說：「我好少諗啲乜，一向都冇諗。」
有否受到城城一番話傷害？Mango直言昨晚出席活動是工作一部份，故此很開心，加上澄清三人關係，更令她感覺輕鬆。會否影響和城城的友誼？Mango認為友誼不會輕易受影響。
從此不再談城城
但城城擺明揀Lynn，Mango明寸城城：「唔講，係你哋寫，我都冇講乜嘢，係好大誤會，令郭生諗多咗，我乜都冇諗。」但城城似暗示Mango博宣傳，Mango說：「我一向好少講佢，係傳媒問到我禮貌答番。」Lynn日前坦言劃清三人關係實是好事，Mango聲稱表示贊同，她亦表示從此之後可以封嘴不需再多談。
同場的楊愛瑾（Miki）被問到傅穎（Theresa）被金牌大風及TalentBang控告違約，Miki表示因不太清楚故不表意見。會否覺得因Theresa過檔太高調才闖禍？Miki說：「唔知，各人有自己做嘢方式，只要結果佢覺得啱就得。」
另外，現場加演模特兒穿上泳衣行騷，新晉模特兒JessicaC.展示美好身材，搶盡風頭。而曾傳緋聞的黃宗澤及梁靖琪不避嫌同坐有講有笑。
採訪：王連連 攝影：陳俊強
