楊千嬅前晚在中環出席日本珍珠Mikimoto新系列酒會，活動由楊千嬅老公丁子高負責，婚後夫妻檔齊齊搵錢。丁子高早早到場，他初時謂不會刻意避開楊千嬅，但合照則免問，丁子高說：「留番擺酒嗰時先啦，留番佢着婚紗最靚一刻。」
怕老婆會發達
記者笑他明益老婆，丁子高肉麻地說：「個客想搵一個代表幸福快樂嘅人，我咪搵佢囉，千嬅好多客都鍾意。」可接受加錢夫婦檔亮相？他說：「我唔係artist，冇所謂，我冇要求，我會畀老婆抽佣，畀9成佢，如果夫妻檔，老婆做management，好老婆梗係好老婆話事，怕老婆先會發達。」
話口未完，千嬅戴着450萬珠鏈到場，丁子高就閃入舖內迴避。千嬅和品牌高層開香檳祝酒，高層又向千嬅狂讚其夫：「你老公工作很勤力，做得好好，等你老公行多點路，賺多點錢。」令千嬅尷尬儍笑。其後她接受訪問時笑說：「工作上唔會避，但唔會合照，因為經理人公司話冇理由雙CD、單碟價，你估出精選咩？」又笑言張智霖一家才是3CD。
發福否認有喜
千嬅謂老公由朝早10點開工到夜晚，怕他行到關節有事，又不忘幫口說：「個客邀請我，好客氣，覺得我如珠如寶，又畀我揀珍珠，我會揀畀媽咪，佢（丁子高）知我鍾意（鑽）石多啲。」見她面頰圓潤，問她是否有喜？千嬅又即時紮紮跳說：「因為啲人恭喜我，請食飯，一日7餐，肥咗啫，唔好話我有BB。」她透露稍後返北京拍賀歲片，月底會和林建岳傾經理人合約。
採訪：羅慧敏
攝影：林德雄