江若琳鎖水三招　急敷Toner

十八廿二無醜婦，江若琳（Elanne）正是人辦。早排直踩拍電影錄MV再返大陸橫店拍劇，忙到甩轆兼撞正皮膚大敵的勁乾天氣都無有怕，依舊水汪汪靚樣見人，搵條紋都難。原來全靠她獨門自創「鎖水三招」，即場示範，各姊妹準備接招過冬啦！

記者：葉雪芯
攝影：林栢鈞
鳴謝場地提供：TheMiraHongKong（23681111）
Makeup：諺瞳小白@PicturesqueGate
Hair：JamesLee@HAiR
Wardrobe：Celia@DadaStylingClub

江若琳分享保濕及護膚心得。

第一招：暖Mask更吸收

勤力小蜜蜂Elanne早前返大陸橫店捱更抵夜拍劇，食不下睡不好兼肚瀉，瘦足一個碼，加上遇正天氣又凍又乾，難得皮膚仲Keep到，全賴獨門保濕秘技：「我每星期最少敷四次保濕Mask，而且特別鍾意敷暖Mask，因為天氣凍時敷塊冷冰冰的Mask上面，一來好難受，二來唔吸收，敷幾多都無用。所以我會先將未開封的Mask放入暖水坐熱，待面膜微暖後再敷上面就最舒服，而且血液循環得好，精華素都吸收好多o架！」坐熱塊Mask呢招都諗到，勁！

■面膜浸暖水至微暖就夠。

第二招：花千元買導入器

個人最怕秋冬上妝，一搽粉底即見皮膚甩皮現細紋。遇着這些情况，Elanne就話有招妝前保濕法：「好彩我仲後生，未需要搽油潤Cream，通常搽清爽WaterGel就夠，就算上妝後都唔怕出面油。最近我更專誠上網用咗千幾蚊買個美容液導入器，配合WaterGel邊搽邊按摩，吸收得好快，之後搽粉底仲好貼服㖭！」女人錢真係易賺！

■搽面霜兼用導入器按摩面部，皮膚更易吸收水份。

第三招：局部敷上妝易

萬一皮膚乾到無得救，出現甩皮情況，Elanne仲有一招急救絕技，就係敷爽膚水！「先用Toner整濕化妝棉，局部敷在乾燥甩皮的位置，大約十分鐘，包保即刻上貼服妝！」打蛇隨棍上，順道問Elanne心水護膚品牌？賣花讚花香，佢例牌答Neutrogena，不過無可否認佢一身滑溜靚肌都是多得它，她仲身先士卒試用新系列Hydro-Boost：「去橫店拍劇這兩個月，我淨係拎咗兩箱Hydro-Boost系列就走上去，日日用，幾乾天氣都頂得住，保濕真係好Work，皮膚質素仲好過以前。」有你真人示範，點都值得試啦！