股神畢菲特日前晒冷買鐵路巨企BNSF，仲話自己係全盤押注美國經濟會持續向好，但佢本自傳《雪球：畢菲特與人生經營》嘅御用作者施羅德，對股神嘅動機，就有唔同睇法。
出手只為巴郡前途
佢覺得股神今次出手，完全係為咗巴郡嘅前途着想，呢個方法可避免喺佢交棒後，繼任人會整死巴郡。
施羅德話，巴郡買咗BNSF後，得返200億美金，冇得做大刁，即係話繼任人接棒後冇得大展拳腳，只可以行返股神舊路，咁樣可避免佢買啲勁複雜嘅金融企業，巴郡就可以無驚無險咁生存落去，完成股神將巴郡延續千秋萬世嘅心願。
點解千揀萬揀，要揀鐵路股呢？施羅德話，股神一向都鍾意造鞋、造磚、電力等傳統穩健嘅公司，呢幾年鐵路股年年都有穩定回報，自然啱佢胃口，加上押注鐵路業等於同美金對賭，能源價格高漲對鐵路更有利，同佢一貫睇淡美金嘅意念相同！
入標普500指日可待
仲有呢，原來股神一直都好想巴郡可以入選標普500指數成份股，可惜B股流通量太低，所以就算標普充斥好多垃圾企業，巴郡都屢次被拒於門外，難免心有不甘。家股神終於搵到藉口拆細B股，相信巴郡入選標普500指數指日可待！
李華華
mailto:[email protected]