政府洩漏市民個人資料嘅新聞記者就報道得多啦，估唔到記者都有一日會成為受害人，而且元凶竟然係民主黨。民主黨為咗方便聯絡傳媒，喺內聯網放咗一份全港傳媒機構記者嘅通訊錄，內有40幾個記者嘅手電號碼同埋電郵地址，要輸入密碼至可以開到。點知前日民主黨突然收到其中一個記者嘅投訴，話佢個朋友無意之中上雅虎搜尋網，竟然輕易咁樣就搵到一份全港傳媒機構記者嘅通訊錄。
傳媒通訊錄被放上網
民主黨總幹事陳家偉解釋，噚日已經從內聯網同互聯網上刪除咗份傳媒機構記者通訊錄，而且逐個記者打電話解釋同埋道歉。
不過份通訊錄究竟點解會喺網上公開，同公開咗幾耐，佢哋都唔清楚。受影響嘅行家都幾煩，尤其係一啲粉絲眾多嘅電視台女主播，事關手電號碼外洩，後果可大可小。