預期下周三派截至9月底止中期業績嘅創業板公司東大照明（8229），噚日率先喺晏晝4點39分發盈警，但呢份通告認真慳家，竟將8月11日發表嘅4至6月份首季度盈警通告「倒模」照出，唯一分別係圈出10組「出錯」字眼（圖），好似老師改學生作文咁，喺旁邊寫番正確答案，例如將「六月三十日止三個月」改為「九月三十日止六個月」。至於點解盈轉虧，東大照明就照辦煮碗話，「因為全球金融動盪及經濟逆轉導致」，一隻字都冇修改！
查實睇番東大去年中期純利係有586.7萬銀，但今年首季度已轉蝕389.6萬銀，華華相信投資者對公司前景心裏有數囉。
雖然呢份「填窿窿」通告並冇畀港交所（388）禁制刊登，但可能效果太經典，東大最終喺6點05分都執番個靚仔版本出街。唉，晨早應該咁做啦！