特首煲呔淪為不受歡迎人物，邊個雪中送炭，邊個落井下石，係二五仔定真朋友，相信煲呔睇清楚。成日窒煲呔嘅金勞詹早前約金管局總裁攞命陳飯敍，建議搵埋煲呔撐枱腳，三個人前晚席設金勞詹地頭佳寧娜，齊啖肥美大閘蟹兼上等靚酒，食足三個鐘先散席。
攞命陳黐住北大人
瞓得好嘅煲呔胃口亦甚佳，金勞詹形容飯敍氣氛極之好，佢又引述煲呔席間慨嘆近日「俾人蝦」，向兩位老友呻傳媒玩謝佢咁滯，金勞詹為佢分憂，建議煲呔大可採取法律行動，一於玩鋪勁，至於煲呔敢唔敢做，真係唔知喇。
金勞詹早前揚言泛民總辭會跟埋一齊辭職，參加補選硬撼泛民，據講煲呔與攞命陳都幾關心金勞詹動向，金勞詹話自己講得出做得到，強調「去」意已決，其他人唔好勸佢，亦唔使阻佢。煲呔不受歡迎，但係回歸金管局嘅攞命陳卻十分「合皮」，佢向金勞詹透露稍後會隨中國代表團外訪，黐住北大人，真係想窮都難咁話。