政壇今年戀事多，兩個失婚男曾鈺成、涂謹申都搵到第二春，前者今個月註冊，後者下個月擺酒，最新傳出喜訊係中大校長劉遵義同哥哥張國榮外甥女麥嘉軒拉埋天窗，頓成政界茶餘飯後熱門八卦話題，接近禮賓府人士笑言，煲呔搞出個經機會總算為經濟學家製造咗個求偶機遇，唔算得個桔。
呢幾單喜事有一個共通點，就係熟女有運行，嫁杏無期嘅中女唔使灰心，你哋嘅未來充滿希望。立法會議員噚日喺宴會廳食飯時吹水，都有講到劉校長一段良緣，人人七嘴八舌都話估佢唔到，有人陰謀論指可能係政治婚姻，一來為不受歡迎嘅煲呔冲喜，同時代佢做一日頭條新聞主角，等煲呔俾人插少一日咁話。
中指黃為囝囝拉紅線
人生大事邊有咁兒戲o架，不過講吓講吓，葉劉以羨慕口脗咁話，不如佢都試吓搵個廿零歲後生仔拍拖，一來佢有第二春調劑生活，而且佢傳出緋聞，應該做到幾日頭條新聞啩，可以幫煲呔解圍，真係一箭雙鵰！葉劉另類以身相許祈盼營救煲呔，仲偉大過「米老鼠」盧維思護主，據講在場議員都笑到收唔到聲，鼓勵佢坐言起行㖭。
葉劉勤於保養，唔講都未必記得佢已經59歲，佢成熟又有主見，剛強中有柔情，應該好受「草食男」歡迎，只要敞開心扉，唔怕冇伴。據講中指黃宜弘即時表態，並非佢對葉劉有意思，只係想為年屆30歲嘅囝囝拉紅線。中指黃抱怨個仔唔願拍拖，然而仔大仔世界，做老竇嘅長氣又怕個仔唔鍾意，真係頭痕。
葉劉好直接斷然拒絕，話30歲仔唔啱佢嘞，不過佢個女榮欣啱啱20歲，若然黃公子有興趣，不妨搵個機會介紹兩人認識都好喎。葉劉咁主動，中指黃梗係話好啦，講到呢度，李華明突然搭訕，話自己個女21歲，又係未拍拖，既然有人做媒，不如預埋李家女兒一份啦。兒子忽然咁搶手，中指黃表現又驚又喜，沉醉於飲新抱茶嘅幻想中樂不可支。
mailto:[email protected]