恒指昨日守穩50日線，惜未能突破，仍係三文治式被3條平均線夾在中間，成交喺星期三咁好炒嘅日子都要縮減，明顯係唔夠信心，轉炒即日鮮策略果然見效，但要謹記落車有時，止蝕亦要有時，死咬唔放夾硬坐過夜，特別係窩輪同牛熊證，隨時一早瞓醒撞個焦頭爛額。
中長線一啲嘅投資者亦不需急於一時，手中心中應常有數隻「池中物」，候低分段吸。但有心水唔代表要即刻瞓身飛撲買入怕蝕底，呢種散戶心態唔要得，因為大莊家往往將圖表畫得靚一靚，連大鱷有時都難避開技術陷阱，散戶中伏又何奇之有？點樣從痛苦中學精，勤力做功課唔夠，仲要知道當中炒乜概念、點捉心理。
震倉有絞肚痛，搞到周身唔自在。先係同鍾司制一樣食咗毒芋團嘅利邦（891），首日顯然以為芋團好好味，最多升近一倍，即市已嘔吐大作，昨日再下「半成」，要止嘔恐怕要等埋今日震走T+2埋單嘅滋事分子至有運行。公司係正經人家又有出色管理層，所謂「不招人㩒是庸股」，升得急回得快係新股正常炒供求作怪，唔使太擔心。
地產半新股反彈可期
另一集被㩒係寶龍地產（1238），走勢浮浮浸浸毫不起眼，但留意保薦人麥格理喺10月23日要穩定股價，以平均價2.643元接咗317萬股，但股價仍暈緊船浪。再睇真啲，噚日1700多萬元成交中，過半係超過10萬股成交，簡直當佢係輪咁炒。不過當波幅慢慢收窄，正係收齊貨先兆，仲有恒大地產（3333）上市，又有多隻地產股招股，報復式反彈可期。
相反，應㩒唔㩒嘅消息股，散戶中伏機會更高。「鱷魚張大口，咬住你隻手」代表作係李澤楷同惠理基金呢對財技孖寶入股嘅先思行（595），任由裂口高開後再升70%，埋單又係唔見一半，中伏者投訴冇天理，但唔該睇睇人家配股價都只係0.681元。
楷仔都睇好要搞LED，總算早前冇睇錯隻真明麗（1868），見過6元後又係被㩒，休息吓儲足電先再上路，有上有落有如巴士到站，讓蟹民有重生機會，呢啲股先係「可持續發展」，倉底總要有一兩隻。
胡孟青